Minn Kattoliku Prattikanti fil-Partit Laburista mill-Imġarr ta’ Malta
Kull min hu Kattoliku prattikanti u għandu għal qalbu s-smiegħ tal-quddies b’mod odjern, bla dubju jieħu gost li tkun qed toqrob it-tmiem tas-sena liturġika bil-festa ta’ Kristu Sultan. Festa li timmarka wara bidu ta’ sena liturġika ġdida bl-Ewwel Ħadd tal-Avvent.
Fl-Arċidjoċesi ta’ Malta din is-sena l-festa ta’ Kristu Sultan kellha tifsira differenti, bl-inkurunazzjoni tal-istatwa ta’ Kristu Re fil-lokalita’ ta’ Raħal Ġdid mill-Arċisqof Charles Ġuda Scicluna. Li ma jafux il-Kattoliċi prattikanti Maltin li jintalbu matul is-sena biex jagħmlu kontribuzzjonijiet favur il-fqar u l-emarġinati hu li tali kuruna bid-djamanti swiet iżjed minn Ewro 100,000 biex saret u dan fi żmien meta l-Knisja Kattolika suppost qed tgħix żmien ta’ tiġdid ‘l bogħod mill-lussu u x-xinxilli.
Ninsew dak li kien jisħaq dwaru Sidna Ġesu’ Kristu: Kont bil-għatx u sqejtuni, Kont Għeri u libbistuni, Kont barrani u lqajtuni, Kont Marid u l-Ħabs u ġejtu żżuruni, kulħadd qisu nesa’ x’jgħid il-Vanġelu ta’ San Mattew f’Kapitlu 28.
Sew ħafna mela għalina l-Kattoliċi li nintalbu biex nikkontribwixxu u d-donazzjonijiet tagħna jmorru għal opra li fil-ħajja tal-lum ma fadlilha ebda sinjifikat u minflok tali flejjes jispiċċaw fid-duħħan? Tali nkurunazzjoni hi pubbliċita’ ħażina għall-Arċidjoċesi Maltija fi żminijet ta’ sekularizazzjoni u meta l-vera identita’ tagħna bħala Kattoliċi Maltin issa marret il-baħar. Il-Knisja Kattolika f’Malta jeħtieġ li tmur lura lejn l-egħruq tagħha ta’ sempliċita’, karita’ u komunjoni fraterna flok tkun mhedija fil-ġerarkiji, negozju istituzzjonalizzat, poter u kontroll tal-parroċċi.
Arċisqof Pawlu Cremona
Il-Knisja Kattolika f’Malta jeħtieġ li terga’ tibda’ tgħix l-impenji evanġeliċi li kien rega’ beda’ inissel fiha l-mibki Arċisqof Pawlu Cremona li bħala Patri Dumnikan kien dejjem ta’ eżempju għal ħutu s-saċerdoti u reliġjużi rġiel u nisa u qatt ma ddandan minn salarji extravaganti kif għandna fil-preżent b’Arċisqof jiekol minn tlett iħluq – salarju ta’ Lecturer fil-Liġi Kanonika fl-Universita’ Gregorjana f’Ruma, salarju ta’ Segretarju Aġġunt fid-Dikasteru għad-Duttrina tal-Fidi fis-Santa Sede u ovvjament salarju fenominali bil-perkaċċi b’kollox mill-Arċidjoċesi ta’ Malta u fi żmien ftit xhur oħra penzjoni mill-Istat Malti.
L-appell ta’ Kattoliku Prattikanti msieħeb fil-Partit Laburista hu wieħed: ejjew nitolbu għat-tisfija tal-Knisja Kattolika f’Malta, ejjew nkunu ta’ eżempju għal ħutna Kattoliċi biex minn fosthom ikollna min hu lest għall-impenn saċerdotali u reliġjuż u fuq kollox li nitolbu ta’ kuljum biex l-Avvent li ser nagħtu bidu għalih nhar il-Ħadd 30 ta’ Novembru jkun żmien ta’ ġabra u dixxerniment tal-fidi vera li aħna nħaddnu u mhux tal-istatwi, il-kuruni, il-muzzetti, il-firjoluni, il-baziliki u d-damask. Irridu nerġgħu naraw lis-saċerdoti u r-reliġjużi lebsin is-suttana u l-abiti tal-kongregazzjonijiet rispettivi tagħhom mingħajr ħafna pompa ta’ slaleb pettorali jew staten ħomor ileqqu.
Dik hi l-vera Knisja Kattolika li naspiraw għaliha għas-sena 2026 meta suppost l-Arċidjoċesi ser ikollha Pjan Pastorali ġdid.
