Matul din l-aħħar sena, jien u marti Amanda konna suġġetti għall-investigazzjoni mill-FCID. Dan wara rapport li sar mill-FIAU, liema rapport spiċċa leaked fil-gazzetti.
Investigazzjoni li kienet komprensiva u wiesgħa min-naħa tal-pulizija sa minn qabel Diċembru 2024. Matul dan iż-żmien aħna kkoperajna bis-sħiħ mal-awtoritajiet ikkonċernati, provdejna kull informazzjoni li ġiet mitluba minna u poġġejna fiduċja sħiħa fil-proċess tal-investigazzjoni. Kien żmien li matulu l-pulizija saħansitra marru barra minn Malta sabiex iġibu r-risposti li kienu qegħdin ifittxu.
Fl-istess waqt, għaddejna dan iż-żmien kollu b’attachment order, li tfisser li ma kellniex aċċess għal flusna, u dan b’detriment għalina u għall-familja tagħna. Ma hi faċli xejn tipprova tgħix ħajtek b’dan il-mod, iżda bil-paċenzja kollha stennejna li l-investigazzjoni tieħu l-perkors tagħha b’mod indipendenti u ħieles minn kull pressjoni.
Madankollu, fl-aħħar sigħat ġejna affaċċjati mill-midja b’ċerti domandi dwar l-investigazzjoni li nkwetawna dwar il-mod ta’ kif miexi l-proċess kollu. Dan għaliex dawn il-mistoqsijiet huma l-istess li konna diġa weġibna għalihom fil-perkors tal-investigazzjoni, li issa hija konkluża.
Allura issa qegħdin ngħidu li persuna għax tkun mara ta’ Ministru ma tistax taħdem fil-privat? Possibbli ġejna f’sitwazzjoni li rridu nindaħlu fil-ħajja privata tan-nies u fejn jaħdmu jew kemm jaqilgħu flus? Għax hawnhekk qegħdin nitkellmu fuq kwistjoni ta’ xogħol fil-privat u mhux mal-Gvern.
Aħna għandna rispett sħiħ lejn il-ġurnalisti u lejn ix-xogħol li jwettqu huma, iżda sfortunatament f’dan il-każ ingħataw informazzjoni skorretta u mhux kompluta, u li ma tagħmilx ġieh lill-fatti hekk kif wieħed jevalwahom.
Bl-akbar responsabbilità nistqarr li l-iskop wara dawn il-mistoqsijiet, u wara l-istorja li qegħda tiġi orkestrata bħalissa, huwa li ttawwal iż-żmien sabiex issir ġustizzja magħna. Ma hemm l-ebda każ, la fuqi u lanqas fuq marti, u s-sewwa jitlob li l-awtoritajiet ikkonċernati jiddikjaraw dan fil-pubbliku. Xi ħadd induna li wasal iż-żmien għal din id-dikjarazzjoni u għalhekk dan huwa biss attentat li għandu l-intenzjoni li b’xi mod jittardja din id-dikjarazzjoni milli ssir u b’hekk itawwal ukoll il-proċess ġudizzjarju.
Fuq kollox, l-intenzjonijiet huma ċari biex ikompli għaddej l-attakk fuqi u fuq familti bil-konsegwenza li nitwaqqaf milli nagħti s-servizz tiegħi lill-Partit Laburista. Din il-ħsara li qegħda ssir lilna qegħda ssir ukoll lill-Partit Laburista hekk kif minħabba f’hekk jiena għadni barra mill-Grupp Parlamentari Laburista u ma nistax ngħin lill-Partit kemm nixtieq. Jiena dejjem sħaqt li lest li nservi – kemm lill-Partit u anke lill-pajjiż.
B’umilta sħiħa nemmen li xogħli fuq il-bankijiet tal-Gvern u bħala Ministru ħallew riżultati li ħadd ma jista’ jiċħadhom. Infakkar li fl-agħar żminijiet tal-pandemija rajna industrija tat-turiżmu li baqgħet b’saħħitha. Bnejna sisien sodi u llum statistika wara l-oħra tikkonferma dan kollu. Ħidmieti kienet u tibqa’ man-nies. Huma l-akbar xhieda ta’ dak li nemmen fih. Fejn stajt dejjem kont ta’ spalla ma kull min kien ta’ rieda rrispetivament kienx Laburist, Nazzjonalist jew ta’ partiti oħra. U hekk nixtieq inkompli nagħmel.
Konxjament naf li dawn l-attakki qegħdin jiġu moħmija biex ifixklu proċess li riesaq lejn l-aħħar fażijiet tiegħu. Għalhekk nistenna li d-dikjarazzjonijiet neċessarji jsiru mill-aktar fis sabiex jiena nkun nista’ nkompli bix-xogħol tiegħi, nidħol lura fil-Grupp Parlamentari Laburista u nikkontesta l-elezzjoni ġenerali li jmiss mal-istess Partit.
