Minn Imħasseb Imsieħeb fil-Partit Laburista
Il-Mistoqsija ser titwieġeb mill-ewwel: LE
U għaliex LE? Ghaliex il-Partit Laburista għandu mandat għal ħames snin biex imexxi l-pajjiż. Minkejja li skont il-Kostituzzjoni ta’ Malta hi prerogattiva tal-Prim Ministru biex isejjaħ elezzjoni ġenerali, il-Mexxej Laburista m’għandu ebda mandat la mill-Konferenża Ġenerali, la mill-Amministrazzjoni u l-anqas mill-Eżekuttiv Nazzjonali sabiex imur għal Elezzjoni Ġenerali bikrija peress li ser jirbaħ it-tellieqa għal Kap tal-Partit Nazzjonalista Adrian Delia jew Alex Borg.
Il-Mexxej tal-Partit mhux akbar mill-Partit u għaldaqstant l-imsieħba li forsi xi wħud fl-organi msemmija hemm min jaħsibhom li huma boloh jew imżażen la huma ħaġa u lanqas oħra.
Robert Abela m’għandu ebda mandat biex iqassar it-terminu tal-leġislatura. M’għandu ebda ġustifikazzjoni lanqas biex jagħmel dan.
La hawn kriżi bankarja fi ħdan il-Bank Ċentrali Ewropew, la f’dak lokali, la f’xi banek lokali li qegħdin joħolqu kriżi ta’ kreditu li l-pajjiż ma jiflaħx għaliha u li bħala Gvern qiegħdha teffetwah ħażin. Lanqas hawn kriżi ekonomika f’Malta fejn saħansitra l-istess Robert Abela nnifsu ħabbar li fl-2026 Malta ser ikollha Estimi Finanżjarji mill-aqwa u li l-pajjiż qatt ma ra bħalhom.
Għaldaqstant, kulħadd jaqbel li hawn normalita’ qawwija li permezz tagħha bit-tmexxija tal-Partit Laburista biss il-pajjiż jista’ jiffjorixxi u jimxi ‘l quddiem.
Imma wieħed jistaqsi bħala msieħba fil-Partit: Forsi hemm xi għanqbut fil-gwardarobbi li aħna ma nafux bihom u Robert Abela qiegħed jibża’ li xi ħadd jiftaħlu dawn il-gwardarobbi u joħolqulu ħafna nkwiet?
Forsi hemm ħafna wirdien f’xi senduq li jekk joħorġu minn xi xaqq x’imkien ser ikun hemm ħafna li jkunu jeħtieġu li jwieġbu għalihom?
Jew Robert Abela issa jinsab konvint li jekk jistenna sal-mument meta tista’ issir elezzjoni ġenerali f’waqtha, jiġifieri Ġunju 2027, intebaħ li Adrian Delia jew Alex Borg huma konvinċenti biżżejjed li jafu jitfgħu lill-Partit Laburista fl-Oppożizzjoni għal għoxrin sena?
L-imsieħba fil-Partit Laburista għandhom dritt li jingħataw dawn it-tweġibiet.
Robert Abela m’għandu ebda mandat biex isejjaħ elezzjoni ġenerali bikrija u jekk jaf li hemm dan l-għanqbut u wirdien, għandu jaqbad il-barri minn qrunu u lil min għamel il-ħażin iwarrbu imma mhux iwarrab hu peress li tali persuni ma setgħux jiġu kkontrollati.
Robert Abela konxju li jekk isejjaħ elezzjoni ġenerali bikrija m’għandu ebda skuża valida biex ikun għamel dan lanqas jekk jirrepeti li l-Partit Nazzjonalista ġab kriżi fil-Parlament Malti minħabba li kellu bidla fil-Kap? Dik xi ħaġa nterna ta’ partit, ġrat fi ħdan il-Partit Laburista fi żmien Joseph Muscat u ġrat b’Bernard Grech, l-ebda kriżijiet parlamentari ma nħolqu. Mela kulħadd jista’ jifhem li Robert Abela bħala l-Mexxej tal-akbar partit politiku f’Malta m’għandu ebda raġuni valida biex isejjaħ elezzjoni ġenerali bikrija ħlief li jista’ ikun li qed iddejqu l-presenża ta’ Adrian Delia jew Alex Borg.
Imma niftakru ħaġa mportanti? Meta Adrian Delia kien Kap tal-PN sondaġġ wara l-ieħor kien juri li m’għandu stima minn ħadd. Għaldaqstant, hemm xi ħaġa li aħna l-imsieħba fil-Partit Laburista ma nafux dwarha fir-rigward ta’ dawn is-sondaġġi u li nbidlet minn dak iż-żmien ‘l hawn?
Ma ninsewx ħaġa waħda. L-ebda skuża ma tista’ tiġġustifika elezzjoni ġenerali bkrija bil-konsegwenża li tali biża’ li tkun tidher jew le taf tfisser li l-Partit Laburista jħossu beżgħan, l-elettorat ma jafdahx u jispiċċa jitlef l-elezzjoni ġenerali bikrija bi ftit minħabba nuqqas ta’ sinċerita’ mal-elettorat innifsu. L-istorja taf tirrepeti lilha nnifisha. Ma ninsewx x’ġara fl-elezzjoni ġenerali bikrija tal-5 ta’ Settembru 1998 fejn il-Partit Laburista spiċċa ntefa’ fl-oppożizzjoni għal 15-il sena sħaħ u kellu jkun Dr. Joseph Muscat biss bħala Mexxej tal-Parit li reġa’ tah in-nifs u l-kuraġġ biex joħroġ rebbieħ.
Ejjew inkunu ċerti minn dak li naħsbu u nitkellmu man-nies speċjalment dawk l-10,000 imsieħeb u msieħba tal-Partit Laburista li s-sena l-oħra ddeċidew li għall-elezzjoni tal-Parlament Ewropew jagħtu daharhom lill-Partit li huma msieħba fih u jibqgħu ġo darhom bil-konsegwenża fost l-oħrajn li maġġoranża li kellu ta’ 42,000 f’elezzjoni simili bit-tmexxija ta’ Dr Joseph Muscat fl-2019 tispiċċa tiżvinta u tonqos għal 8,000, distakk ikrah ta’ 34,000.
Ma nilgħabux man-nar imsieħba għeżież tal-Partit Laburista.
N.B. L-artikli minn kontributuri huma indipendenti mill-opinjoni editorjali ta’ dan is-sit.
