Il-Partit Laburista matul is-snin wera li hu l-uniku partit politiku li tassew jifhem u jħoss il-bżonnijiet tal-familji Maltin u Għawdxin. B’politika soċjali u ekonomika soda, il-Gvern Laburista baqa’ jpoġġi l-familja fiċ-ċentru tal-ħidma tiegħu.
Illum il-poplu jaf li kull miżura introdotta – mill-in-work benefit, sal-childcare b’xejn, mill-pensjonijiet imtejba sal-investiment fil-qasam tas-saħħa u l-edukazzjoni – kollha kienu passi konkreti biex il-familji tagħna jgawdu kwalità ta’ ħajja aħjar.
Meta pajjiżi oħra fl-Ewropa raw lill-ħaddiema u lill-familji tagħhom ibatu bl-inflazzjoni u biż-żieda fil-prezzijiet, il-Gvern Laburista kien it-tarka li ħares lill-familji tagħna. Huwa grazzi għall-politika ta’ subsidi fuq l-enerġija u l-fjuwil li llum il-Maltin u l-Għawdxin mhumiex iħossu l-piż qawwi li qed iħossu popli oħra.
Il-Partit Laburista jibqa’ l-għażla naturali ta’ min irid futur ta’ sigurtà, stabbiltà u progress. Għaliex il-familja hija l-qalba tas-soċjetà, u t-tarka tagħha tibqa’ l-Partit Laburista.
