Fuq inizjattiva tal-Anzjanità Attiva u Kura fil-Komunità (AACC), inħolqot kompetizzjoni fost il-membri taċ-Ċentri għall-Anzjanità Attiva biex joħolqu d-disinji tal-kartolini uffiċjali tal-Milied 2025. L-anzjani ġew mistiedna jesprimu l-kreattività tagħhom billi jissottomettu disinji oriġinali għal kartolini li se jintużaw sabiex jintbagħtu l-awguri tal-Milied u tas-Sena l-Ġdida f’diversi dipartimenti, inklużi lill-membri anzjani nfushom.
B’parteċipazzjoni minn 18-il ċentru differenti, ġew sottomessi total ta’ 68 disinn uniku. Il-bord tal-għażla kellu diffikultà biex jagħżel l-aħjar kartolini, peress li l-livell kien għoli u l-ideat varjati. Fl-aħħar nett, intgħażlu l-aqwa 10 disinji rebbieħa, li ġew stampati b’mod professjonali u jinkludu l-isem tal-artist anzjan u ċ-ċentru rispettiv.
Ir-riżultati ta’ din il-kompetizzjoni ġew imħabbra waqt attività fiċ-Ċentru għall-Anzjanità Attiva tas-Siġġiewi, fejn kienu preżenti s-Segretarju Parlamentari għall-Anzjanità Attiva, Malcolm Paul Agius Galea, kif ukoll is-Segretarju Permanenti Renzo De Gabriele. Matul l-attività, id-disinji kollha sottomessi kienu għall-wiri.
Is-Segretarju Parlamentari Agius Galea spjega kif din l-inizjattiva, bl-isem “Minn Qalb l-Anzjani”, turi t-talenti, il-ħila u l-ispirtu kreattiv li għadhom preżenti b’mod qawwi fost l-anzjani. Huwa żied jgħid li inizjattivi bħal dawn mhux biss isebbħu l-festi, iżda jservu ta’ spazji ta’ espressjoni u valur personali għall-anzjani.
Fid-dawl tas-suċċess ta’ din il-kompetizzjoni, id-Dipartiment tal-AACC qed jikkunsidra li jorganizza edizzjonijiet simili matul is-sena, fosthom għall-Għid il-Kbir, sabiex il-parteċipazzjoni kreattiva tal-anzjani tkun kontinwa u viżibbli.
