It-tmexxija tal-Iran ġiet attakkata u meqruda qisu ma ġara xejn. Dak li ġara ma jfissirx biss att militari; jissimbolizza xi ħaġa aktar profonda.
In-normi li darba kienu jżommu l-Ordni Internazzjonali, issa tfarrku. Ir-regoli li fuqhom kienet mibnija s-sistema globali qed jitilfu s-saħħa tagħhom, u l-istrutturi li kellhom jipproteġuhom, u hawn nirreferi għal Nazzjonijiet Uniti, spiċċaw bħal dell ta’ Istituzzjonijiet minn epoka tal-passat.
United Nations
F’dan il-kuntest, il-messaġġ mgħoti hemm barra huwa ċar: il-Liġi Internazzjonali m’għadhiex il-limitu suprem tal-azzjoni politika. Dak li jibqa’ huwa l-ġudizzju tas-saħħa u r-rieda tal-poter. Meta mexxej jgħid li kull azzjoni tiegħu hija ġġustifikata sempliċement għax huwa jista’ jagħmilha, allura l-bilanċ bejn il-liġi u l-forza jisfaxxa.
Dan biddel il-mentalità tal-Ordni Dinjija. L-istruttura li kienet tfittex li tillimita l-poter permezz ta’ regoli u istituzzjonijiet, qed tagħti lok għal realtà kważi primittiva. Realtà fejn il-forza ssir il-lingwa primarja tal-politika u tieħu post id-Diplomazija.
Id-dinja kienet diġà miexja gradwalment lejn din id-direzzjoni. Iżda jiġi mumenti fl-Istorja li huma bħall meta wieħed jaqsam pont, u ċ-ċirkostanzi jwasslu li r-ritorn lura għall-punt tat-tluq ikun impossibbli. Il-mument li qed ngħixu bħalissa jista’ jiġi deskritt b’mod hekk sempliċi.
Jekk Stat jista’ jelimina t-tmexxija militari, politika u reliġjuża ta’ Stat Sovran mingħajr ebda qafas legali jew mandat Internazzjonali, allura d-dinja tidħol f’fażi ġdida. F’din il-fażi, il-liġi ma tibqax il-pedament tal-Ordni, iżda ssir sempliċi dekorazzjoni u irrelevanti għar-realtà dominata mill-poter.
U meta dan iseħħ, jerġa’ jitfaċċa prinċipju antik ħafna:
Meta l-Liġi tmut, jibqa’ biss il-poter. U l-filosofija tal-Poter hi sempliċi: Li għandi nagħmel se nagħmlu. Jekk nista’ nagħmlu, ser nagħmlu.
