L-artiklu ppubblikat f’The Sunday Times of Malta mis-suppost opinjonista Kevin Cassar jipprova jibni narrattiva sensazzjonali minn ritratt u laqgħa, aktar milli minn fatti u kuntest.
Iżda r-realtà hija ħafna aktar kumplessa minn headline provokattiva.
Il-fatt li l-eks-Prim Ministru Joseph Muscat kellu laqgħa ma’ Papa Ljun XIV qed jiġi ppreżentat bħala xi forma ta’ approvazzjoni politika jew bħala “skandlu”. Din hija interpretazzjoni żbaljata tal-funzjoni tal-Papa u tal-Vatikan. Il-Papa jiltaqa’ ma’ eluf ta’ persuni minn madwar id-dinja kollha, mexxejja politiċi, personalitajiet pubbliċi u nies ordinarji.
Dawn il-laqgħat huma parti mill-missjoni pastorali tiegħu u mhux xi forma ta’ ġudizzju legali jew politiku.
Imma aktar minn hekk, hemm tentattiv ċar biex l-istorja ta’ persuna waħda titnaqqas għal kapitlu wieħed biss. Il-wirt politiku ta’ Joseph Muscat ma jistax jitħassar b’ritratt jew b’interpretazzjoni partikolari ta’ avveniment wieħed.
Taħt it-tmexxija tiegħu, Malta esperjenzat wieħed mill-aktar perjodi ta’ tkabbir ekonomiku b’saħħtu fl-istorja moderna tagħha. Perjodi, li l-poplu Malti u Għawdxi għadu qiegħed igawdu mill-frott tiegħu.
Taħt Joseph Muscat, l-impjiegi laħqu livelli rekord, il-paga minima u l-benefiċċji soċjali żdiedu, u eluf ta’ familji raw titjib konkret fil-kwalità tal-ħajja tagħhom. Riformi importanti bħall-introduzzjoni ta’ drittijiet ċivili avvanzati, inkluż l-ugwaljanza fiż-żwieġ, bidlu l-pajjiż b’mod profond u pożittiv.
Il-politika tiegħu wasslet ukoll biex Malta ssaħħaħ ir-reputazzjoni tagħha bħala ekonomija dinamika fil-qalba tal-Mediterran, b’investiment barrani qawwi u setturi ġodda li ħolqu opportunitajiet għal ġenerazzjoni sħiħa u li iva għamlu lil pajjiżna “l-aqwa fl-Ewropa.”
Joseph Muscat
Dan ma jfissirx li ma jistax ikun hemm kritika. Il-kritika hija parti essenzjali minn kull demokrazija. Iżda meta d-dibattitu pubbliku jitnaqqas għal attakki personali jew tentattivi biex titħassar storja politika sħiħa, inkunu qed nitilfu l-perspettiva.
Ir-realtà hija li l-wirt politiku ta’ Joseph Muscat jibqa’ wieħed mill-aktar kapitli influwenti fl-istorja politika reċenti ta’ Malta, kapitlu li ġab bidliet ekonomiċi, soċjali u istituzzjonali li għadhom jinħassu sal-lum.
F’soċjetà matura, il-ġudizzju għandu jsir fuq il-fatti, il-politika u r-riżultati, mhux fuq ritratt jew headline provokattiva. Id-dibattitu pubbliku jistħoqqlu aktar serjetà u aktar bilanċ minn hekk.
John Grech huwa s-Segretarju Internazzjonali tal- Partit Laburista.
