Malta bniet rekord b’saħħtu ta’ reżiljenza u tkabbir. Il-kapitlu li jmiss huwa li dan is-suċċess jinbidel f’kwalità ta’ ħajja aħjar, firxa t’opportunitajiet u direzzjoni fit-tul aktar ċara.
Malta kisbet id-dritt li titkellem dwar l-ekonomija tagħha b’kunfidenza.
Matul l-aħħar snin, pajjiżna bena rekord ta’ reżiljenza u progress kostanti li huwa rikonoxxut mhux biss lokalment, iżda wkoll internazzjonalment. F’żmien meta l-inċertezza ffurmat parti kbira mid-diskussjoni globali, Malta kompliet tispikka bħala waħda mill-aqwa ekonomiji fl-Ewropa, bil-Kummissjoni Ewropea li għadha qed tistenna tkabbir b’saħħtu, inflazzjoni li għad trid tkompli tonqos, u tiddeskrivi s-suq tax-xogħol bħala wieħed strett.
Il-valur veru ta’ dan is-suċċess mhuwiex sempliċiment li Malta kibret. Huwa li Malta wriet li pajjiż żgħir jista’ jkun dinamiku, kompetittiv u ambizzjuż fil-mod kif jibni l-futur tiegħu.
L-istorja ekonomika tagħna tirrifletti ekonomija li evolviet maż-żmien, waħda li tgħaqqad turiżmu b’saħħtu ma’ servizzi orjentati internazzjonalment, attività diġitali, għarfien professjonali u mentalità intraprenditorjali li għenet lil Malta tibqa’ dinamika f’dinja li qed tinbidel malajr. L-IMF irrimarkat l-espansjoni rapida li għamlet Malta matul l-aħħar għaxar snin, b’dħul per capita li kważi rdoppja mill-2013 ’l hawn, u t-tkabbir ekonomiku b’medju ta’ kważi 7% fis-sena, immexxi prinċipalment mis-servizzi, inklużi t-turiżmu, il-gaming u s-servizzi professjonali.
Dan huwa importanti għax is-saħħa ekonomika qatt ma hija dwar il-prestazzjoni makroekonomika biss. Hija dwar x’tagħmel possibbli dik is-saħħa fil-ħajja tan-nies.
Ekonomija b’saħħitha tagħti l-kunfidenza lin-nies. Tappoġġja x-xogħol u l-aspirazzjoni. Tippermetti lin-negozji jippjanaw, lill-familji jħarsu ’l quddiem u liż-żgħażagħ jemmnu li f’Malta jeżistu diversi opportunitajiet ukoll. Meta l-ekonomija tibqa’ attiva u reżiljenti, din tinħass mhux biss fil-boardrooms jew fir-rapporti uffiċjali, iżda fl-esperjenza ta’ kuljum tan-nies li jixtiequ sigurtà, progress u ċ-ċans li jimxu ’l quddiem.
Fl-istess ħin, is-suċċess m’għandux jissodisfana u nieqfu hemm. Għandu jwassal għal aktar ħidma.
Il-kapitlu li jmiss tal-ekonomija Maltija għandu jkun dwar tkabbir iffokat u mmirat, u sens aktar b’saħħtu ta’ x’tip ta’ pajjiż irridu nibnu fis-snin li ġejjin.
Huwa għalhekk li l-Viżjoni 2050 hija importanti. Is-sinifikat tagħha jinsab fil-fatt li tqiegħed il-ħsieb fit-tul fil-qalba tad-diskussjoni u torbot il-progress ekonomiku ma’ ambizzjoni usa’: reżiljenza aktar b’saħħitha, kwalità ta’ ħajja aħjar u mudell nazzjonali aktar sostenibbli għall-futur. Huwa sforz fit-tul biex tittejjeb il-kwalità tal-ħajja, jissaħħu l-pedamenti ekonomiċi u soċjali, u jiġi żgurat li l-ġenerazzjonijiet futuri jirtu pajjiż li huwa reżiljenti, dinamiku u mimli opportunitajiet.
Malta diġà wriet li tista’ toħloq tkabbir. Diġà wriet li tista’ tikkompeti, tadatta u tattira opportunitajiet. Issa, il-pass li jmiss huwa li nibnu fuq dan is-suċċess billi nkomplu ninvestu fl-affarijiet li se jkunu l-aktar importanti fil-fażi li jmiss tal-iżvilupp: il-ħiliet, l-innovazzjoni, l-ippjanar fit-tul u l-kundizzjonijiet li jippermettu li negozju ta’ kwalità jiffjorixxi.
Hekk il-progress ekonomiku jsir xi ħaġa aktar profonda u reżistenti. Isir mhux biss storja ta’ prestazzjoni, iżda storja ta’ direzzjoni nazzjonali.
Il-progress ta’ Malta huwa reali. Ġie miksub b’ħidma u għandu jagħtina kunfidenza.
Ir-responsabbiltà issa hija li niżguraw li dan is-suċċess ikompli jittraduċi ruħu f’kwalità ta’ ħajja aħjar, firxa t’opportunitajiet u futur li mhux biss ikun ta’ suċċess, iżda jkun ukoll maħsub tajjeb.
Dan huwa l-kapitlu ekonomiku li jmiss li Malta għandha tikteb.
