Fis-16 ta’ Ottubru, Malta pparteċipat f’laqgħa bejn il-Ministri tad-Difiża tal-pajjiżi Ewropej li huma parti minn missjoni ta’ żamma ta’ paċi tan-Nazzjonijiet Uniti, magħrufa bħala UNIFIL, biex tiġi diskussa s-sitwazzjoni fin-Nofsinhar tal-Libanu. Laqgħa li matulha Malta sostniet li s-sigurtà tal-UNIFIL għandha tibqa’ prijorità.
Fi tmiem din il-laqgħa, Malta flimkien mal-Awstrija, il-Kroazja, Ċipru, Franza, il-Finlandja, il-Ġermanja, il-Greċja, l-Ungerija, l-Irlanda, l-Italja, il-Latvja, l-Olanda, il-Polonja u Spanja adottat dikjarazzjoni li ġiet ppubblikata l-Erbgħa, u li qiegħda tiġi inkluża flimkien ma’ din l-istqarrija.
Din il-laqgħa ssegwi stqarrijiet li għamlu l-Kunsill tas-Sigurtà tan-Nazzjonijiet Uniti kif ukoll il-Kunsill Ewropew dwar is-sitwazzjoni attwali fil-Libanu, fosthom billi juru appoġġ għall-ħarsien tal-membri tal-UNIFIL u għall-waqfien mill-ġlied.
Malta, bħala membru mhux permanenti tal-Kunsill tas-Sigurtà tan-Nazzjonijiet Uniti qed tkompli taħdem mill-qrib mal-imsieħba tal-Unjoni Ewropea u l-komunità internazzjonali sabiex nassiguraw is-sigurtà tas-suldati tagħna filwaqt li jiġi salvagwardjat il-mandat tal-UNIFIL.
- UNIFIL
Permezz tal-Forzi Armati ta’ Malta, pajjiżna ilu jikkontribwixxi għall-Forza Interim tan-Nazzjonijiet Uniti fil-Libanu (UNIFIL) b’tim ta’ suldati min-Novembru 2018, u bħalissa Malta għandha uffiċjal u sitt suldati Maltin fil-Libanu. Din il-Forza, għandha rwol importanti b’mandat min-Nazzjonijiet Uniti għaż-żamma tal-paċi fir-reġjun. Is-suldati kollha jipparteċipaw fuq bażi volontarja u wara proċess ta’ għażla, jingħataw taħriġ rigoruż kemm f’Malta kif ukoll barra minn Malta.
Il-kontinġent tal-Forzi Armati ta’ Malta huwa bbażat mal-Battaljun Irlandiż.
Ta’ kuljum Malta qiegħda f’kuntatt mas-suldati Maltin, sabiex tiġi żgurata s-sigurtà tagħhom u jingħataw l-appoġġ kollu meħtieġ.