Hemm mumenti fil-ħajja politika meta l-eżerċizzju tal-poter jikxef il-karattru veru tiegħu.
Mhux waqt ir-rutina komda tal-amministrazzjoni, iżda fil-mument meta kriżi titlob deċiżjoni, veloċità u responsabbiltà.
Meta tasal kriżi serja, il-Mexxej jiġi ġġudikat mhux mill-kliem iżda mill-kapaċità tiegħu li jaġixxi.
Mexxej li jħaddem bis-sħiħ l-istrumenti leġittimi tal-Istat, li jinsisti fuq riżultati, u li jmexxi l-Istituzzjonijiet lejn riżoluzzjoni b’urġenza straordinarja, ikun qed jeżerċita waħda mill-aktar funzjonijiet essenzjali tal-poter: li ma jħallix id-diżordni tiddetta l-kors tal-avvenimenti.
Il-konvinzjoni li, meta ċ-ċirkostanzi jitolbuha, il-makkinarju tal-Istat għandu jkun kapaċi jimxi b’determinazzjoni lejn il-verità u l-ġustizzja.
Hekk aġixxa l- eks Prim Ministru Dr. Joseph Muscat wara l-qtil tas-Sinjura Daphne Caruana Galizia.
Sfortunatament, il-politika tgħallimna illi l-istess intensità li f’mument ta’ kriżi tiġi mfaħħra bħala determinazzjoni, snin wara, tiġi interpretata bħala waħda suspettuża.
Ġaladarba jgħaddi ftit taż-żmien, tibda l-battalja fuq il-memorja.
Ir-reqqa ssir “eċċess”.
Il-veloċità ssir “suspettuża”.
Id-determinazzjoni ssir “pressjoni”.
U dak li fil-mument kien meqjus bħala prova ta’ serjetà jiġi “spinnjat” bħala raġuni għad-dubju.
Hawnhekk tibda l-gwerra mill-Establishment.
Tinbeda kampanja organizzata bil-għan li tkisser ir-reputazzjoni tal-vittma tagħhom.
Hekk għamlu lil Joseph Muscat eżattament wara l-qtil ta’ Daphne Caruana Galizia.
Partijiet mill-midja li huma kkontrollati mill-Establishment jinbidlu f’munizzjon sabiex dawn jilħqu l-miri tagħhom.
Gwerra psikoloġika billi: tiżola lill-persuna; tirrepeti l-istess mistoqsijiet anke meta ma jkunx hemm evidenza ġdida; toħloq atmosfera ta’ suspett.
Żommu f’moħħkom fattur importanti.
Fi gwerra tar-reputazzjoni, ma hemmx għalfejn tissostanzja l-akkuża. Din it-tip ta’ gwerra tilħaq l-skopijiet tagħha meta tagħmilha impossibbli li l-akkuża (mingħajr ebda prova) kontra l-individwu tmut.
Erġgħu aqrawha u ifhmu sew.
Il-mira tal-Establishment ma tkunx biss li tagħmel ħsara fuq livell politiku, iżda li titfa’ psikoloġikament lill-individwu taħt assedju.
Kampanja li teżawrixxi, tiżola u, fl-aħħar mill-aħħar, iġġiegħel lill-individwu jibda jiddubita mhux biss minn kif jarah ħaddieħor, iżda mill-ġudizzju tiegħu stess.
Din hija l-arkitettura tal-gwerra tar-reputazzjoni li l-Establishment għażel li juża kontra Joseph Muscat; mhux illum, iżda mill-għada tar-riżultat elettorali tal-2013. Gwerra li matulha mhux jagħtuh daqqa waħda, iżda elf daqqiet żgħar; mhux akkuża waħda, iżda atmosfera li qatt ma titħalla tmajna u tispiċċa.
Din hija Kampanja maħsuba sabiex iddgħajjef lil min ikun ħa azzjoni. Ġlieda kontra l-azzjoni permezz ta’ narrattiva.
Kif għamlu lil Joseph Muscat wara li l-azzjoni li ħa waslet biex il-każ jissolva fi żmien rekord.
Min ikun ħa d-deċiżjoni politika għandu jibqa’ jiddefendiha. Hekk se jibqa’ jagħmel Joseph Muscat.
Min jibni n-narrattiva kontrih, min-naħa l-oħra, xogħolhom huwa biss li jżommu ħaj in-narrattiva li “hemm xi ħaġa ħażina”.
Il-gwerra li l-Establishment ħejjew kontra JM fil-każ tal-qtil ta’ Daphne Caruana Galizia hija waħda ta’ reverse psychology;
Il-passi neċessarji meħuda minn Dr. Muscat sabiex jissolva l-każ u li wasslu għall-ordni, tiġi ppreżentata bħala s-sors tad-diżordni; id-determinazzjoni tiegħu li fittxet tweġibiet tiġi trasformata f’ostaklu għall-verità; u l-veloċità li kienet meħtieġa f’dak il-mument tinbidel fi prova kontra min aġixxa.
Bil-mod il-mod, il-kriżi oriġinali titwarrab mill-memorja kollettiva. Minflokha tidħol narrativa: mhux aktar “x’ġara?” iżda “għaliex aġixxa daqshekk malajr?”
Il-pubbliku jiġi mġiegħel mingħajr ma jintebaħ sabiex jinsa ċ-ċirkostanzi li kienu jitolbu l-urġenza u minflok jikkontempla biss “id-dellijiet” li jingħad li dik l-urġenza ħolqot.
Din hija l-arkitettura tal-gwerra tar-reputazzjoni li l-Establishment għażel li juża kontra Joseph Muscat. Bdewha fl-2013 u għadhom għaddejjin biha sal-lum.
Innutaw l-eskalazzjoni hekk kif beda l-ġuri ta’ Yorgen Fenech.
Madankollu, sinjuri, żommu f’moħħkom illi kull narrattiva mibnija fuq l-ambigwità għandha dgħufija waħda iżda kruċjali: li tiddependi fuq il-fatt li l-istampa sħiħa ma tiġix eżaminata.
Erġgħu aqrawha…
Il-pjan tal-Establishment jesiġi;
Li ċerti mistoqsijiet jibqgħu mistoqsia għal dejjem.
Li ċerti kontradizzjonijiet ma jiġux iċċarati.
Li ċertu silenzju jibqa’ bla spjegazzjoni.
U l-aktar ħaġa importanti għalihom huwa li l-pubbliku qatt ma jieqaf u jħares lejn l-istorja kollha.
Iżda ż-żmien għandu mod partikolari kif ibiddel il-perspettiva.
Fatti li darba dehru iżolati jibdew jingħaqdu.
Kontradizzjonijiet li darba setgħu jiġu injorati jibdew jiffurmaw stampa ċara. U dak li ġie ikkritikat mill-Establishment bħala sensiela spontanja ta’ reazzjonijiet, jibda jidher bħala xi ħaġa aktar strutturata.
Għalhekk il-verità mhux dejjem tasal bħala SPLUŻJONI.
Xi drabi tasal bħala RIKOSTRUZZJONI.
Biċċa biċċa.
Kontradizzjoni wara l-oħra.
Saff wara saff.
Il-verità hija rkupru gradwali tal-proporzjon. Ma taħdimx skont l-iskeda ta’ dawk li jippruvaw ifasslu l-memorja pubblika kif jaqbel lilhom. Ma hemmx ħtieġa li tgħajjat biex teżisti.
Tista’ tistenna.
U jien ukoll nista’ nistenna.
Għax hemm żmien għas-skiet, żmien għall-osservazzjoni, u żmien meta l-biċċiet kollha jkunu biżżejjed biex jiffurmaw stampa li ma tistax tibqa’ tiġi injorata.
Jien kont, għadni u nibqa’ warajh.
U meta jasal dak il-mument, jien se nitkellem.
U dak il-mument qed joqrob.
VERITAS ET AEQUITAS
