Il-Papa Ljun XIV, bil-Kardinal Malti Mario Grech maġenbu, ipoġġi l-futur tal-familja fiċ-ċentru tar-riflessjoni tal-Knisja, fost tħassib dejjem jikber dwar id-distakk bejn il-valuri Nsara u r-realtajiet tas-soċjetà moderna.
Il-Papa Ljun XIV fetaħ laqgħa importanti fil-Vatikan, li qed issir bil-bibien magħluqa bejn is-7 u l-14 ta’ Ottubru, bil-parteċipazzjoni tal-presidenti tal-konferenzi episkopali u l-mexxejja tal-Knejjes Kattoliċi tal-Lvant.
Il-laqgħa qed tfakkar l-għaxar anniversarju tal- Amoris Laetitia (“Il-Ferħ tal-Imħabba”) tal-Papa Franġisku, dokument li jittratta l-imħabba fiż-żwieġ u l-ħajja tal-familja.
Fid-diskors tal-ftuħ tiegħu, li sar bl-Ingliż fis-Sala tal-Udjenzi Pawlu VI, il-Papa indirizza aktar minn 150 isqof miġbura madwar imwejjed tondi. Huwa saħaq li s-sbuħija, iżda wkoll il-fraġilità tal-familja, għandhom ikunu fiċ-ċentru tat-talb, tar-riflessjoni u tal-missjoni pastorali tal-Knisja.
Il-laqgħa, imsejħa mill-Papa stess u organizzata mid-Dikasteru għal-Lajċi, il-Familja u l-Ħajja flimkien mas-Segretarjat Ġenerali tas-Sinodu, għandha bħala tema ewlenija ż-żwieġ u l-familja fid-dawl tal-isfidi tas-soċjetà kontemporanja.
Wieħed mill-aktar punti sinifikanti fid-diskors tal-Papa kien it-tħassib tiegħu dwar id-distakk dejjem jikber bejn il-mod kif is-soċjetà moderna tħares lejn is-sesswalità u l-intimità, u l-viżjoni Nisranija taż-żwieġ.
Il-Papa osserva li ż-żgħażagħ għadhom jixxenqu għall-imħabba vera, għall-fedeltà u għal sens profond ta’ appartenenza. Madankollu, ħafna minnhom qed isibuha dejjem aktar diffiċli biex jemmnu li impenn dejjiemi, mibni fuq iż-żwieġ u l-fedeltà għal ħajjithom kollha, jista’ jwassalhom għall-milja li jixtiequ.
Huwa ħeġġeġ lill-isqfijiet biex ma jaħarbux mill-mistoqsijiet diffiċli li joħorġu mill-esperjenzi konkreti tal-familji, partikolarment dawk li jgħaddu minn kriżijiet, firda, solitudni u sitwazzjonijiet ta’ vulnerabbiltà.
Fl-istess waqt, il-Papa fakkar li l-fidi Nisranija tibqa’ sors ta’ dawl u tama anke meta l-ħajja tal-familja tkun immarkata mid-diffikultajiet jew minn dak li jidher bħala falliment.
Id-distakk bejn il-ġid li l-bniedem jixtieq iwettaq u dak li fil-prattika jirnexxilu jgħix, sostna l-Papa, għandu jfakkarna fil-ħtieġa tal-grazzja, tal-maħfra u tal-possibbiltà ta’ bidu ġdid.
F’dan il-kuntest, Ljun XIV poġġa quddiem l-isqfijiet mistoqsija fundamentali: X’tip ta’ Knisja jsibu quddiemhom il-persuni u l-familji meta jkunu għaddejjin mill-aktar mumenti fraġli ta’ ħajjithom?
Maġenb il-Papa kien hemm il-Kardinal Mario Grech, Segretarju Ġenerali tas-Sinodu tal-Isqfijiet.
